ទឹកជ្រោះប៊ូស្រាបេះដូងមណ្ឌលគិរី រមណីដ្ឋានធម្មជាតិនៅភាគឦសាននៃប្រទេសកម្ពុជា
ទឹកជ្រោះប៊ូស្រាដ៏ល្បីល្បាញ និងស្រស់ស្អាតរបស់ខេត្តមណ្ឌលគិរីដែលតារាចម្រៀងអធិរាជសំឡេងមាស លោក ស៊ីន ស៊ីសាមុត និងអ្នកស្រីរស់ សេរីសុទ្ធា លើកយកមករំលេចជាបទចម្រៀងដ៏ក្រអួនក្រអៅនោះ ត្រូវបានគេដឹងថា នៅតែជាចំណុចទាក់ទាញដ៏ខ្លាំងក្លាសម្រាប់បណ្តាភ្ញៀវទេសចរជាតិ និងអន្តរជាតិ ទៅទស្សនាខេត្តមណ្ឌលគិរី បើទោះបីជាតំបន់ទេសចរណ៍មួយនេះនៅមិនទាន់មានការវិនិយោគឲ្យកាន់តែប្រសើរក្តី។
ទឹកជ្រោះប៊ូស្រា បានបង្កប់លាក់ខ្លួននៅក្នុងដែនព្រៃដ៏ជ្រៅដែលមានចម្ងាយប្រមាណ៤៣ គីឡូម៉ែត្រពីទីរួមខេត្តមណ្ឌលគិរីស្ថិតនៅក្នុងស្រុកពេជ្រយ៉ាដា។
ទឹកជ្រោះនេះជាតំបន់ទេសចរណ៍ល្អជាងគេក្នុងខេត្តមណ្ឌលគិរី។ ទឹកជ្រោះដ៏ទាក់ទាញនេះត្រូវបានចែកចេញជាបីដំណាក់។ ដំណាក់ទី១ ហូរធ្លាក់ក្នុងកម្ពស់៨ទៅ ១២ម៉ែត្រ ដែលមានមុខកាត់ទទឹង១៥ម៉ែត្រ នៅរដូវវស្សា និងកម្ពស់ពី១០ទៅ១៥ម៉ែត្រ នៅរដូវប្រាំង។
ដំណាក់ទី២ ហូរធ្លាក់ពីកម្ពស់១៥ ទៅ២០ម៉ែត្រ និងមានមុខកាត់ទទឹង២០ម៉ែត្រនៅរដូវវស្សា និងកម្ពស់ពី១៨ ទៅ២៥ម៉ែត្រ ដែលមានមុខកាត់ ១៣ម៉ែត្រ នៅរដូវប្រាំង។
ទឹកធ្លាក់ទី២នេះ មានចម្ងាយ១៥០ម៉ែត្រពីទឹកធ្លាក់ទី១។ ដំណាក់ទី៣ ហូរធ្លាក់ដោយល្បឿនលឿនខ្លាំងជាងល្បាក់ទី២។ ល្បាក់នេះ យើងមិនអាចទៅដល់បានទេ ពីព្រោះជាតំបន់ព្រៃក្រាស់ ខ្វះមធ្យោបាយធ្វើដំណើរ និងជាតំបន់គ្រោះថ្នាក់ដោយសារពពួកសត្វព្រៃ។
ក្រៅពីរមណីយដ្ឋានធម្មជាតិដ៏ស្រស់ត្រកាលនៅជុំវិញទឹកជ្រោះប៊ូស្រាគេក៏បានដឹងផងដែរថា ទីនោះជាតំបន់ដែលមានបងប្អូនជនជាតិព្នងរស់នៅយ៉ាងច្រើនកុះករផងដែរដែលពេលនេះ ពួកគេភាគច្រើនកំពុងមានការផ្លាស់ប្តូរទាំងការរស់ និងស្លៀកពាក់ផងដែរ។
សម្រាប់ខេត្តមណ្ឌលគិរី ទឹកជ្រោះប៊ូស្រា នៅតែជាទីដ៏ទាក់ទាញបំផុត ដែលគ្រប់ភ្ញៀវទាំងអស់នៅពេលមកដល់ខេត្តនេះមិនអាចមើលរំលងបាន។ លោក ញ៉ែង ច្រឹក ប្រធានសមាគមទឹកជ្រោះប៊ូស្រា បានឲ្យដឹងថា ភ្ញៀវជាតិ និងអន្តរជាតិតែងមកលេងនៅទីនេះរាល់ថ្ងៃមិនដែលដាច់ឡើយ តិចច្រើនទៅតាមពេលវេលា និងរដូវ។
លោកបាននិយាយថា៖«ជាធម្មតាភ្ញៀវមកលេងទីនេះមិនដែលដាច់ទេ ហើយភ្ញៀវភាគច្រើនមានចំនួនកើនឡើងនៅថ្ងៃចុងសប្តាហ៍ ពិសេសនៅថ្ងៃបុណ្យទាន។ ពួកគេមកអង្គុយលេងញ៉ាំអាហារ និងងូតទឹកជ្រោះដ៏ត្រជាក់ជាលក្ខណៈគ្រួសារ និងមិត្តភក្តិ»។
លោកបានបញ្ជាក់ថា៖«ភាគច្រើននៅពេលថ្ងៃឈប់សម្រាក ឬក៏បុណ្យចូលឆ្នាំហ្នឹង មានមន្ត្រីរាជការ ទាហាននិងអ្នកធ្វើការឯកជនជាច្រើន មកជាក្រុមៗតែម្តង ហើយពេលខ្លះស្ទើរតែគ្មានកន្លែងអង្គុយសម្រាកលេងទៀតផង»។
នៅពេលនេះ អាជ្ញាធរខេត្តកំពុងធ្វើការស្ថាបនាផ្លូវក្រាលកៅស៊ូដ៏ល្អមួយខ្សែពីស្រុកសែនមនោរម្យនៃខេត្តមណ្ឌលគិរីឆ្ពោះទៅកាន់ឃុំតាអង ស្រុកកូនមុំខេត្តរតនគិរី ដូច្នេះអាជ្ញាធរខេត្តសង្ឃឹមថា ការតភ្ជាប់បណ្តាញហេដ្ឋារចនាសម្ព័ន្ធនេះនឹងកាន់តែជំរុញឲ្យមានការទាក់ទាញទ្វេឡើងពីសំណាក់ភ្ញៀវទេសចរជាតិ និងអន្តរជាតិមកពីគ្រប់ទិសទី។
លោក យីម លុច្ស អភិបាលរងខេត្តមណ្ឌលគិរីមានប្រសាសន៍ថា៖«ក្នុងឆ្នាំ២០១៥ តាមផែនការដែលបានគ្រោងទុកផ្លូវពីសែនមនោរម្យទៅឃុំតាអង្គខេត្តរតនគិរីនោះ ត្រូវបានស្ថាបនាហើយទាំងស្រុង ពេលនោះផ្លូវក៏ហើយរួចរាល់ ទេសចរក៏កាន់តែមានកំណើនឡើងថែមទៀត ដូច្នេះខ្ញុំមានជំនឿយ៉ាងមុតមាំថា ខេត្តមណ្ឌលគិរី នឹងរីកចម្រើនលឿន»។
គួរបញ្ជាក់ថា ក្រៅពីងូតទឹកជ្រោះធម្មជាតិដ៏ត្រជាក់ដល់ក្រអៅបេះដូងនិងអង្គុយទទួលទានអាហារដ៏មានឱជារសជាមួយមិត្តភក្តិ និងក្រុមគ្រួសារ ក្រោមជំនោរចំហាយទឹកជ្រោះដ៏ត្រជាក់នោះ ភ្ញៀវទេសចរទាំងអស់ក៏អាចចំណាយពេលតុបតែង និងស្លៀកពាក់បែបជនជាតិដើមភាគតិចព្នងដើម្បីថតរូបទុកជាអនុស្សាវរីយ៍ផងដែរ។
ភ្ញៀវទេសចរភាគច្រើននិយាយថា គ្រប់ពេលដែលពួកគេមកមណ្ឌលគិរី ពួកគេមិនដែលអាក់ខានមកប៊ូស្រាឡើយ៕
