ក្រវាញអាចយកមកធ្វើថ្នាំកម្លាំង ឬថ្នាំរំងាប់គ្រុនក្ដៅ
ក្រវាញ គឺជាឈ្មោះរុក្ខជាតិស្មៅមានពីរប្រភេទ ៖
១. ក្រវាញភ្នំ
សណ្ឋានរុក្ខជាតិ៖ ក្រវាញ គឺជាឈ្មោះរុក្ខជាតិម្យ៉ាង ប្រភេទជាស្មៅធំកម្ពស់ពី២ ទៅ៣ម៉ែត ដុះលាយក្រកោដំរី នៅជើងភ្នំក្រវាញ។ ដើមរុក្ខជាតិនេះ ក៏មានដុះនៅប្រទេសថៃផងដែរ។ គ្រាប់វាមានក្លិនដូចទេពិរូ ឬដូចម្រេច។
អត្ថប្រយោជន៍រុក្ខជាតិ៖
ប្រជាជននៅតាមទីជនបទ ឬព្រៃភ្នំយកស្លឹកខ្ចីៗមកធ្វើជាបន្លែសម្រាប់ស្លបរិភោគបាន។ ចំណែកមើមរបស់វា គេតែងយកធ្វើថ្នាំកម្លាំង ឬថ្នាំរំងាប់គ្រុនក្ដៅ។ ផ្លែក្រវាញខ្មែរ និងសៀម ពួកចិននៅហុងកុងទិញជិតអស់ ដើម្បីនាំយកទៅលក់គ្រប់ប្រទេសក្នុងសកលលោក។ ពួកចិន គេប្រើគ្រាប់ក្រវាញ ធ្វើឱសថព្យាបាលជំងឺគ្រប់មុខនៃជំងឺពោះវៀន។ នៅទ្វីបអឺរ៉ុប គេយកគ្រាប់ក្រវាញធ្វើថ្នាំក្រពះ ខ្យល់ក្នុងពោះ និងថ្នាំលើកកម្លាំង។
២. ស្មៅក្រវាញជ្រូក
ស្មៅក្រវាញជ្រូក គឺជាស៊ីពេរ៉ាសេស្ថិតស្ថេរមួយប្រភេទដែលមានក្ដៀងកកើតទៅជាមើម ហើយច្រើនឈរត្រង់ទៅលើមានកម្ពស់ពី១៥ ទៅ២០សម ។ ដើមវាឈរត្រង់ទៅលើគ្មានបែកធាងមានសភាពរលីងសណ្ឋានជាត្រីកោណ ហើយមានគល់បែកមើមឡើងប៉ោង ។ ក្ដៀងវាលាតទ្រង់ស្ដើងមានសម្បុរស និងសាច់ច្រើនផង ។ ក្ដៀងទាំងនោះមានស្លឹករាងដូចស្រកាគ្របពីលើនៅពេលដើមខ្ចី ប៉ុន្តែក្លាយទៅជាសរសៃៗនៅពេលដើមចាស់ ។ មើមមានទំហំមិនស្មើគ្នាទេ មានប្រវែងពី១ ទៅ២,៥សម ។ មើមនោះពណ៌សមានឱជារសណាស់បើវានៅខ្ចី តែដល់ចាស់ទៅក្លាយជាមានសរសៃច្រើនពណ៌ម៉ារ៉ុង ឬ ខ្មៅ ។ ស្លឹកនៅគល់មានពណ៌បៃតងចាស់មានសណ្ឋានដូចខ្សែបន្ទាត់ ។ ស្ទបផ្កាវាមានប្រវែងពី៥ ទី២៥សម និងទទឹងរហូតដល់ទៅ៥មម ។
កញ្ចុំផ្កាគឺជាផ្កាឆត្រទោល ឬរួម មានស្ទបផ្កាពី២ ទៅ៤ នៅគល់ដែលមានទ្រង់ទ្រាយជាស្លឹក ។ កាំដំបូងរបស់វាចំនួនទី៣ ទៅ៨ មានប្រវែងពី២ ទៅ៥សម មានកួរផ្កាខ្ចីៗនៅចុងដែលមានអេពីយេពី៣ ទៅ១០ ពណ៌ត្នោតលាយក្រហម និងជួនកាលមានកាំបន្ទាប់ចំនួនពី១ ទៅ២ នៅគល់កួរផ្កានេះទៀតផង ។ អេពីយេមានប្រវែងពី១ ទៅ២,៥សម ហើយទទឹងពី១,៥ ទី២មម រាងសំប៉ែត ហើយស្រួចនៅខាងចុង ។ អេពីយេទាំងនោះមានផ្កាពី១០ ទៅ៤០ គ្របគ្នាទៅវិញទៅមកយ៉ាងជិត ហើយប្រែទៅជាពណ៌ត្នោតលាយក្រហមទៅពេលទុំ ។ ស្រកាក្រៅមានប្រវែង៣មម និងមានចុងទាល ។
ផ្លែវាជាផ្លែមានសម្បករឹងរាងពងក្រពើ ឬរាងទ្រវែងពងក្រពើមានមុខ៣ និងប្រវែង១,៥មម ។ ផ្លែនេះមានពណ៌ខ្មៅនៅពេលទុំ ។ ការដុះដាលស្មៅក្រវាញជ្រូកប្រព្រឹត្តទៅតាម ក្ដៀង មើម និងគ្រាប់ ។
អត្ថប្រយោជន៍រុក្ខជាតិ៖
ស្មៅមួយប្រភេទនេះប្រើជាថ្នាំកែរោគ ។ កបនឹងជម្ងឺ៖ ឈឺទ្រូង ឈឺក្រោមឆ្អឹងជំនី ឈឺចុកក្រពះ ឈឺពោះ ហើមពោះ ក្អួតចង្អោរ អាហារមិនរលាយ ភើរជូរ។ រាំងរដូវ រដូវមិនទៀង ឈឺចុកចាប់ពេលមានរដូវ របួសប៉ះទង្គិច។ កំរិតប្រើ៖ 3g - 9g ហាលឲ្យស្ងួតដាំផឹកផឹក ព្រឹក ថ្ងៃ ល្ងាច។
