ឯកសារស្ដង់ដារបណ្ណាល័យបឋមសិក្សា
ដោយអនុលោមតាមផែនការជាតិអប់រំសម្រាប់ទាំងអស់គ្នា ក្រសួងអប់រំ យុវជន និងកីឡា បាននឹងកំពុងប្រឹងប្រែងយ៉ាងសកម្ម ក្នុងការលើកកម្ពស់គុណភាពធនធានមនុស្សនៅព្រះរាជាណាចក្រកម្ពុជា។
ក្នុងការចូលរួមអនុវត្តគោលដៅអប់រំជាតិ និងផែនការជាតិអប់រំសម្រាប់ទាំងអស់គ្នា ក្រសួងអប់រំ យុវជន និងកីឡា មានតួនាទីយ៉ាងសកម្មក្នុងការពង្រឹងគុណភាពអប់រំនៅគ្រប់ភូមិសិក្សា ដើម្បីលើកកម្ពស់វិស័យអំណានឱ្យកាន់តែមានសន្ទុះឈានឡើងជាលំដាប់។
ក្រោមកិច្ចសហប្រតិបត្តិការជាមួយដៃគូអភិវឌ្ឍនានា ក្រសួងអប់រំ យុវជន និងកីឡា បានអភិវឌ្ឍបណ្ណាល័យសាលារៀនជាច្រើន ដើម្បីឆ្លើយតបទៅនឹងតម្រូវការរៀន និងបង្រៀន របស់សិស្សានុសិស្ស និងគ្រូបង្រៀន ។ ដើម្បីអភិវឌ្ឍបណ្ណាល័យសាលារៀនឱ្យកាន់តែមានប្រសិទ្ធិភាព និងគុណភាពខ្ពស់ ព្រមទាំងអនុវត្តឱ្យបានឯកភាពគ្នាទូទាំងប្រទេស ក្រសួងអប់រំ យុវជន និងកីឡា ចាំបាច់ត្រូវមានស្ដង់ដារបណ្ណាល័យមួយ។
ឯកសារស្ដង់ដារបណ្ណាល័យបឋមសិក្សានេះ មានផលប្រយោជន៍ណាស់សម្រាប់គ្រប់អ្នកពាក់ព័ន្ធ ការងារបណ្ណាល័យ ជាពិសេស គណៈនាយកសាលា និងបណ្ណារក្ស យកទៅប្រើប្រាស់ជាខ្នាតគម្រូ ក្នុងការអភិវឌ្ឍបណ្ណាល័យរបស់ខ្លួន។
ក្រសួងអប់រំ យុវជន និងកីឡា សង្ឃឹមថា លោក លោកស្រី និង យកចិត្តទុកដាក់អនុវត្ត និងប្រើប្រាស់ឯកសារនេះ ឱ្យអស់លទ្ធភាព ដើម្បីចូលរួមចំណែកក្នុងការអភិវឌ្ឍធនធានមនុស្សប្រកបដោយប្រសិទ្ធភាព និងគុណភាពខ្ពស់។
ក្នុងនាមក្រសួងអប់រំ យុវជន និងកីឡា ខ្ញុំសូមថ្លែងអំណរគុណចំពោះដៃគូអភិវឌ្ឍទាំងឡាយ ដែលបានចូលរួមវិភាគទានទាំងបច្ចេកទេស និងថវិកា ក្នុងការចងក្រងឯកសារ ស្ដង់ដារបណ្ណាល័យបឋមសិក្សា ព្រមទាំងមន្ត្រីអប់រំគ្រប់លំដាប់ថ្នាក់ដែលបានយកអស់កម្លាំងកាយ និងស្មារតី ធ្វើឱ្យសម្រេចបាននូវ ឯកសារដ៏មានសារប្រយោជន៍នេះ ។
ដកស្រង់ចេញពី បុព្វកថានៃឯកសារស្ដង់ដារបណ្ណាល័យបឋមសិក្សា លេខ ២២១៥ អយក.ប្រក ចុះថ្ងៃទី ០៤ សីហា ឆ្នាំ ២០១១ របស់រដ្ឋមន្ត្រីក្រសួងអប់រំ យុវជន និងកីឡា ឯកឧត្តម អ៊ឹម សិទ្ធី
