ការគ្រប់គ្រងសាលារៀនផ្អែកលើលទ្ធផល ស្វ័យវាយតម្លៃសាលារៀន
ឯកសារប្រតិបត្តិស្ដីពី ស្វ័យវាយតម្លៃសាលារៀន មានគោលបំណងសម្រាប់ជួយនាយកសាលាដឹកនាំសកម្មភាពស្វ័យវាយតម្លៃសាលារៀនជាប្រចាំ ដើម្បីស្វែងយល់ពីចំណុចជោគជ័យ និងកំណត់ពីស្ថានភាពដែលសាលារៀនត្រូវកែលម្អ។ សកម្មភាពនេះនឹងមានការចូលរួមពីសំនាក់ក្រុមប្រឹក្សាកុមារ គ្រូបង្រៀន អាជ្ញាធរដែនដី និងអ្នកពាក់ព័ន្ធ។ លទ្ធផលស្វ័យវាយតម្លៃសាលារៀននឹងប្រើសម្រាប់ធ្វើផែនការអភិវឌ្ឍសាលារៀនដោយមានការចូលរួមពីគ្រប់សមាសភាពអ្នកពាក់ព័ន្ធក្នុងសាលារៀន និងក្នុងមូលដ្ឋានភូមិ ឃុំ ដើម្បីដោះស្រាយបញ្ហាឱ្យស្របទៅនឹងតម្រូវការដែលមូលដ្ឋានអាចជួយបានសម្រាប់ការរៀនសូត្ររបស់កុមារ។
ដូចនេះឯកសារស្វ័យវាយតម្លៃសាលារៀនមិនមែនជាការស្វែងរកការខ្វះខាត និងកំហុសរបស់អ្នកអនុវត្ត ដើម្បីធ្វើការស្ដីបន្ទោសនោះទេ តែវាជារបៀបជួយតាមរបៀបជួយតាមបែបវិជ្ជាជីវៈរបស់អ្នកគ្រប់គ្រងនៅមូលដ្ឋាន នូវកម្រិតចំណេះដឹងក្នុងការធ្វើការងារ និងការលំបាករបស់អ្នកអនុវត្តក្នុងពេលបំពេញភារកិច្ចប្រចាំថ្ងៃដោយសារកត្តផ្សេងៗ។
ឯកសារនេះក៏ជាមធ្យោបាយដ៏សំខាន់បំផុតជួយដល់ថ្នាក់ដឹកនាំ សាលារៀនក្នុងការធ្វើផែនការអភិវឌ្ឍសាលារៀន ដើម្បីធានាបាននូវការឆ្លើយតបទាន់ពេលពីតម្រូវការ បញ្ហារបស់នាយកសាលា លោកគ្រូ អ្នកគ្រូ សិស្សានុសិស្ស គណៈកម្មការសាលា និងសហគមន៍ ជាពិសេសបានចូលរួមចំណែក យ៉ាងខ្លាំងនៃសកម្មភាពរៀន និងបង្រៀននៅតាមថ្នាក់និងសាលារៀន។ ម្យ៉ាងវិញទៀត វាក៏បានបង្ហាញពីកម្រិតអភិវឌ្ឍសាលារៀនតាមផ្នែកនីមួយៗនៃឧបករណ៍ផលជះកម្មវិធីសាលាកុមារមេត្រី និងជាមធ្យោបាយក្នុងការពន្លឿន ដើម្បីសម្រេចគោលដៅអប់រំជាតិ។
